देह पर दोहे

हाड़ जलै ज्यूँ लाकड़ी, केस जले ज्यूँ घास।

सब तन जलता देखि करि, भया कबीर उदास॥

माया मुई न मन मुवा, मरि-मरि गया सरीर।

आसा त्रिष्णाँ नाँ मुई, यौं कहै दास कबीर॥

गज बर कुंभहिं देखि तनु, कृशित होत मृगराज।

चंद लखत बिकसत कमल, कह जमाल किहि काज॥

राते पट बिच कुच-कलस, लसत मनोहर आब।

भरे गुलाब सराब सौं, मनौ मनोज नबाब॥

नील वसन दरसत दुरत, गोरी गोरे गात।

मनौ घटा छन रुचि छटा, घन उघरत छपि जात॥

सुनियत कटि सुच्छम निपट, निकट न देखत नैन।

देह भए यों जानिये, ज्यों रसना में बैन॥

कुंभ उच्च कुच सिव बने, मुक्तमाल सिर गंग।

नखछत ससि सोहै खरो, भस्म खौरि भरि अंग॥

उठि जोबन में तुव कुचन, मों मन मार्यो धाय।

एक पंथ दुई ठगन ते, कैसे कै बिच जाय॥

मुग्धा तन त्रिबली बनी, रोमावलि के संग।

डोरी गहि बैरी मनौ, अब ही चढ़यो अनंग॥

ऐसे बड़े बिहार सों, भागनि बचि-बचि जाय।

सोभा ही के भार सों, बलि कटि लचि-लचि जाय॥

अपने अँग के जानि कै जोबन-नृपति प्रवीन।

स्तन, मन, नैन, नितंब कौ बड़ौ इजाफा कीन॥

तीन लोक भौ पींजरा, पाप-पुण्य भौ जाल।

सकल जीव सावज भये, एक अहेरी काल॥

अंग-अंग-नग जगमगत दीप-सिखा सी देह।

दिया बढाऐं हूँ रहै बड़ौ उज्यारौ गेह॥

बाग़ों ना जा रे ना जा, तेरी काया में गुलज़ार।

सहस-कँवल पर बैठ के, तू देखे रूप अपार॥

पायन पुहुमी नापते, दरिया करते फाल।

हाथन पर्वत तौलते, तेहि धरि खायो काल॥

मूवा है मरि जाहुगे, बिन शिर थोथी भाल।

परेहु करायल बृक्ष तर, आज मरहु की काल॥

हाड़ जरै जस लाकड़ी, बार जरै जस घास।

कबिरा जरे रामरस, जस कोठी जरै कपास॥

सुंदर देही पाय के, मत कोइ करैं गुमान।

काल दरेरा खाएगा, क्या बूढ़ा क्या ज्वान॥

त्रिबली, नाभि दिखाइ कर, सिर ढकि, सकुचि समाहि।

गली, अली की ओट कै, चली भली बिधि चाहि॥

गर्व भुलाने देह के, रचि-रचि बाँधे पाग।

सो देही नित देखि के, चोंच सँवारे काग॥

सुंदर देही देखि के, उपजत है अनुराग।

मढी न होती चाम की, तो जीबत खाते काग॥

इस जीने का गर्व क्या, कहाँ देह की प्रीत।

बात कहते ढह जात है, बारू की सी भीत॥

सुन्दर गर्व कहा करै, देह महा दुर्गंध।

ता महिं तूं फूल्यौ फिरै, संमुझि देखि सठ अंध॥

सुन्दर तूं तौ एकरस, तोहि कहौं समुझाइ।

घटै बढै आवै रहै, देह बिनसि करि जाइ॥

बलि किउ माणुस जम्मडा, देक्खंतहँ पर सारु।

जइ उट्टब्भइ तो कुहइ, अह डज्झइ तो छारु॥

सुन्दर अविनाशी सदा, निराकार निहसंग।

देह बिनश्वर देखिये, होइ पटक मैं भंग॥

माटी सूं ही ऊपज्यो, फिर माटी में मिल जाय।

फूली कहै राजा सुणो, करल्यो कोय उपाय॥

सुन्दर मैली देह यह, निर्मल करी न जाइ।

बहुत भांति करि धोइ तूं, अठसठि तीरथ न्हाइ॥

अधर मधुरता लेन कों, जात रह्यौ ललचाइ।

हा लोटन मैं मन गिर्यो, उरजन चोट न खाइ॥

सुन्दर पांणी सींचतौ, क्यारी कंण कै हेत।

चेतनि माली चलि गयौ, सूकौ काया खेत॥

हँसै न बोलै नैक हूं, खाइ न पीवै देह।

सुन्दर अंनसन ले रही, जीव गयौ तजि नेह॥

ज्यौं कौ त्यौं ही देखिये, सकल देह कौ ठाट।

सुन्दर को जांणै नहीं, जीव गयौ किहिं बाट॥

सुन्दर बंधै देह सौं, तौ यह देह निषिद्धि।

जौ याकी ममता तजै, तौ याही मैं सिद्धि॥

सुन्दर कहा पखारिये, अति मलीन यह देह।

ज्यौं-ज्यौं माटी धोइये, त्यौं-त्यौं उकटै खेह॥

गरव करत है देह को, बिनसै छिन में मीति।

जिहि प्रानी हरि जस कहिओ, नानक तिहि जग जीति॥

क्षीण सपष्ट शरीर है, शीत उष्ण तिहिं लार।

सुन्दर जन्म जरा लगै, यह पट देह विकार॥

देह स्वर्ग अरु नरक है, बंद मुक्ति पुनि देह।

सुन्दर न्यारौ आतमा, साक्षी कहियत येह॥

सुन्दर देह मलीन है, राख्यौ रूप संवारि।

ऊपर तें कलई करी, भीतरि भरी भंगारि॥

सुन्दर देह मलीन है, प्रकट नरक की खानि।

ऐसी याही भाक सी, तामैं दीनौ आंनि॥

कबहूँ निकसै न्हारवा, कबहूँ निकसै दाद।

सुन्दर ऐसी देह यह, कबहूँ न मिटै बिषाद॥

कबहूँ पेट पिरातु है, कबहूँ मांथै सूल।

नैंन नाक मुख मैं बिथा, कबहूँ न पावै सुक्ख॥

कनक वरन सुंदर वदन, कमल नयन कटि छीन।

बरुन बान भुव भंग जनु, मदन चाँप करि लीन॥

मन नितंब पर गामरू, तरफरात परि लंक।

बर बेनी नागिनि हन्यौ, खर बीछी को डंक॥

सुन्दर मुख मैं हाड सब, नैन नासिका हाड।

हाथ पाँव सब हाड के, क्यौं नहिं समुंझत रांड॥

देह कृत्य सब करत है, उत्तम मध्य कनिष्ट।

सुंदर साक्षी आतमा, दीसै मांहि प्रविष्ट॥

सुन्दर कबहूं फुनसली, कबहूं फोरा होइ।

ऐसी याही देह मैं, क्यौं सुख पावै कोइ॥

सुन्दर काला घटै बढै, शशि मंडल कै संग।

देह उपजि बिनशत रहै, आतम सदा अभंग॥

सुन्दर तत्व जुदे-जुदे, राख्या नाम शरीर।

ज्यौं कदली के खंभ मैं, कौन बस्तु कहि बीर॥

सुन्दर देह मलीन अति, नख शिख भरे बिकार।

रक्त पीप मल मूत्र पुनि, सदा बहै नव द्वार॥

सुन्दर ऐसी देह मैं, सुच्चि कहो क्यौं होइ।

झूठेई पाखंड करि, गर्व करै जिनि कोइ॥