संबंध पर दोहे

रहिमन धागा प्रेम का, मत तोड़ो छिटकाय।

टूटे से फिर न मिले, मिले गाँठ परिजाय॥

जमला लट्टू काठ का, रंग दिया करतार।

डोरी बाँधी प्रेम की, घूम रह्या संसार॥

हरे चरहिं तापहिं बरे, फरें पसारहिं हाथ।

तुलसी स्वारथ मीत सब, परमारथ रघुनाथ॥

जरउ सो संपत्ति सदन, सुख सुहृद मातु पितु भाइ।

सनमुख होत जो रामपद, करइ न सहस सहाइ॥

माता पिता लगावते, छाती सौं सब अंग।

सुन्दर निकस्यौ प्रान जब, कोउ न बैठै संग॥

मेरै मंदिर माल धन, मेरौ सकल कुटुंब।

सुंदर ज्यौं को त्यौं रहै, काल दियौ जब बंब॥

सुन्दर पक्षी वृक्ष पर, लियौ बसेरा आनि।

राति रहे दिन उठि गये, त्यौं कुटंब सब जानि॥

सुन्दर भइया कहत हौ, मेरी दूजी बांह।

प्राण गयौ जब निकसि कैं, कोउ न चंपै छांह॥

सुन्दर लोग कुटंब सब, रहते सदा हजूरि।

प्रान गये लागे कहन, काढौ घर तें दूरि॥

संग सखा सब तजि गये, कोउ न निबहिओ साथ।

कहु नानक इह विपत में, टेक एक रघुनाथ॥

सुन्दर बंध्या देह सौं, कबहु न छूटा भाजि।

और कियौ सनमंध अब, भई कोढ मैं खाजि॥

सुन्दर नारी करत ही, पिय सौं अधिक सनेह।

तिनहूं मन मैं भय धर्यौ, मृतक देखि करि देह॥

निज करि देखिओ जगत में, कोइ काहु को नाहिं।

नानक थिर हरि भक्ति है, तिह राखो मन माहिं॥

सुन्दर समझि विचार करि, तेरौ इनमैं कौंन।

आपु-आपु कौं जाहिगें, सुत दारा करि गौंन॥

मात पिता बंधव सकल, सुत दारा सौं हेत।

सुन्दर बंध्या मोहि करि, चेतै नहीं अचेत॥

सुन्दर नाना जोनि मैं, जन्म-जन्म की भूल।

सुत दारा माता पिता, सगलै याही सूल॥