झूलै कुँवरि गोपराइन की। मधि राधा सुंदरि-सुकुमारि॥
प्रथमहि रितु पावस आरम्भ। श्रीवृषभानु मँगाये खंभ॥
काढ़ि भवन ते रतन अमोल। पटि-पचि-रुचिर रचाइ हिंडोल॥
एक-तें एक सुभग सुकुमारि। रचा मनीं बिधि कुंकुम नारि॥
जगमगाति नव जोबन-जोति। निरखि नैन चकचौंधी होति॥
बरन-बरन चूनरी सुरंग। फबी सलौने सोने-अंग॥
राजत मनि-अभरन रमनीय। गुही जुही कबरी कमनीय॥
गवाहिं सुघर सरस रसगीत। दुलरावैं मन मोहन मीत॥
प्रेम-बिबस भई सकहिं न गाइ। उपज्यौ आनंद उर न समाइ॥
दुरि देखत गोकुल-कुलराइ। सोभा निरखत मन न अघाइ॥
मुदित ‘गदाधर’ नंदकिसोर। लोचन भये भरे के चोर॥
स्रोत :
- पुस्तक : ब्रजमाधुरी सार (पृष्ठ 83)
- रचनाकार : ग
- प्रकाशन : हिंदी साहित्य सम्मेलन, प्रयाग
- संस्करण : 2002
Additional information available
Click on the INTERESTING button to view additional information associated with this sher.
About this sher
Close
rare Unpublished content
This ghazal contains ashaar not published in the public domain. These are marked by a red line on the left.
