मोहन-वदन की सोभा।
जाहि देखत उठति सखि आनंद की गोभा॥
नैन धीर अधीर कछु-कछु असित सित राते।
प्रिया-आनन चंद्रिका-मधुपान-रस-माते॥
बंसिका कलहंसिका मुख-कमल-रस-राची।
पवन परसत अलक अलिकुल कलह-सी माची॥
ललित लोल कपोल, कुंडल मधुर-मकराकार।
जुगल सिसु सौदामिनी जनु नचत नट-चटसार॥
विमल जलक सुढार मुक्ता नासिका दीनों।
ऊँच आसन पर असुर-गुरु उदौ-सौ कीनों॥
भौंह सोहनिका कहौं अरु भाल कुमकुम-बिंदु।
स्यामबादर-रखे परि मनु अबहिं ऊग्यौ इंदु॥
लग्यौ मन ललचाइ तातें टरत नहिं टार्यो।
अमित अद्भुत माधुरी पर ‘गदाधर’वार्यौ॥
स्रोत :
- पुस्तक : ब्रजमाधुरी सार (पृष्ठ 78)
- रचनाकार : गदाधर भट्ट
- प्रकाशन : हिंदी साहित्य सम्मेलन, प्रयाग
- संस्करण : 2002
Additional information available
Click on the INTERESTING button to view additional information associated with this sher.
About this sher
Close
rare Unpublished content
This ghazal contains ashaar not published in the public domain. These are marked by a red line on the left.
