फागुन के रंग लखौ गुइयाँ
phagun ke rang lakhau guiyan
सुरजन की किरनै चमकि उठीं
जाड़े कै रितु बीती गुइयाँ
बिरछन के हरे पतउन मा
कोइली कै कूक सुनौ गुइयाँ।
टेसू सेमल की देहीं पर
जोबन का रंग चढ़ा गुइयॉ
गमके मउहा मउहारिन मा
विरहिन कै कूक सुनौ गुइयाँ।
लटके छत्ता मधुमक्खिन के
खोड़किल मा चिहुँकि उठे टुइयाँ
बंसी बाजी बॅंसवारिन मा
निर्गुनिया तान सुनौ गुइयाँ।
गेहूँ जौ की छरहरि बाली
पछुआ सॅंग झूमि रही गुइयाँ
कचवांसे लहिला का ह्वारा
निंबिया की छाँह चखौ गुइयाँ।
सुख-दुख तौ जीवन कै बदरी
घामा-छाँही कै गति गुइयाँ
मेहनति की फसलै पाकि गयीं
हॅंसिया पर सान धरौ गुइयाँ।
स्रोत :
- रचनाकार : रामशंकर वर्मा
- प्रकाशन : हिन्दवी के लिए लेखक द्वारा चयनित
Additional information available
Click on the INTERESTING button to view additional information associated with this sher.
About this sher
Close
rare Unpublished content
This ghazal contains ashaar not published in the public domain. These are marked by a red line on the left.
