बरिगा जाए सहर कै लीला
bariga jaay sahar kai lila
बरिगा जाए सहर कै लीला।
हियाँ न सूरज आसमान मा
भोरहे रंगै रंगोली
दूरि दूरि तक बिरछ न बिरवा
न चिरई कै बोली
जइसी द्याखौ बइसी ठाढ़े
कंकरीट के टीला।
हियाँ परोसी ते न मतलब
आँखिन परिगा सूखा
केहिके घर मा गाज गिरी है
कउन मरि गवा भूखा
सबके घर मा ताला लटके
बाहेर गाड़े कीला
हियाँ फलाने गाँव छोडिकै
खुद का साहेब ब्वॉलें
बीटेक एमटेक करिकै लरिका
घर मा घुइयाँ छवालें
दुइ कमरा के दड़बा मइहाँ
दुनिया का टंडीला।
हियाँ न मन का चैन ज़िंदगी
घोड़न क्यार तबेला
मनई के ऊपर बस मनई
धकापेल का मेला
कउनो पिज़्ज़ा बर्गर मसकै
कोउ का आटा गीला।
स्रोत :
- रचनाकार : रामशंकर वर्मा
- प्रकाशन : हिन्दवी के लिए लेखक द्वारा चयनित
Additional information available
Click on the INTERESTING button to view additional information associated with this sher.
About this sher
Close
rare Unpublished content
This ghazal contains ashaar not published in the public domain. These are marked by a red line on the left.
