कोकिल अब क्यों मौन गही?

बहु विधि फूल विपिन में फूले मंद समीर बही॥

बौराए बहु आम मंजरिन तीखी सान लही।

फूल उठे बन उपबन सिगरे उमगी परत मही॥

अपने हाथ बहुरि कुसुमायुध फूल कमान गही।

चटक चाँदनी निर्मल चंदा विरहिन अधिक दही॥

मत्त भई मलयज संग डोलत सौरभ अति उलही।

नाचत मोर कीर बहु गावत चाचर होय रही॥

फूलन-फूलन डोलत अलिंगन करते चित्तचही।

फूली लता लपटि तरु से कुछ सुख की बात कही॥

तू कैसे चुप साधि रह्यो प्रिय टुक तो बोल सही।

शोभा नव वसना की बनि के आ गई नव दुलही।

पंचम राग सुना अब प्यारे सुख को सार यही।

जौलों रहे वसंत रहेगो इक तेरो जस ही॥