एक कोण : मनःस्थिति
काँचे
कमान पर
बौड़ायल-औंधायल
मानवीय देवता,
हमर मनःस्थिति कमौंठ जकाँ फेकल अछि,
स्वयंसँ,
हमर आस्थासँ,
भौगतायल ग्रह-सूत्र
चनकल कुहेस पाट छनकि गेल
भनकि गेल,
साँझ-बोर
आकर्षण
दृष्टि दोष
जखन-तखन
पूर्वापर वयस-बाँस मँहकि गेल,
सोझाँमे
जङला केर फाँकसँ
देखि रहल—
किचिर-किचिर
चुम्बन
आ आलिंगन
—भरम जाल,
स्नेहास्पद अकुलायल ताल-मेल,
मूँहक कुस्वाद तँ भाङठ होयबे करत,
रूप-गँध
वर्णभेद
आगाँ बढ़बे करत,
साध्ये की?
अङस-मङस कयल
जे
एतबा हम बूझि वृत्ति;
तकरे ई प्रायश्चित्त अछि,
तकरे सभ आश्रित अछि:
कोढ़ी किरिन होउक—किन्तु तेँ उदार नीति!
हुहुआइत बहैत जाइत पछवा बसात व्यस्त
घरमे, आङनमे बाहरमे, —चारू कात;
सोझ हम ठाढ़े छी,
हमर बोध तीते अछि,
अभरल जँ स्वत्व किछु
मानब नहि, मानब नहि, मानब नहि...
हऽऽऽम।
खाँहें किछु होइत होउक।
- पुस्तक : मैथिलीक नव कविता (पृष्ठ 100)
- संपादक : रामकृष्ण झा ‘किसुन’
- रचनाकार : रमानन्द रेणु
- प्रकाशन : सांस्कृतिक विभाग, बिहार
- संस्करण : 1971
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
