अथ वैदेही कथा
ओकरो आँखिमे
अगहनक रौद आ फागुनक मधु उतरऽ लगैत छैक
ओकरो सपनामे उड़ियाबऽ लगैत छैक रंग
ओकरो देह बाजऽ लगैत छैक
मौसमक संग-संग
ओकरो पड़ोसिया
ओकरा देखिकऽ कनफुसकी करऽ लगैत छैक
ओकरो माय 'कुलच्छनी' बेटीक चालि-चलन देखिकऽ
कानय-उसझय लगैत छैक
ओकरो बाप भटकऽ लगैत छैक—
गामे-गाम
एक दिन ओहो चलि जाइत अछि सासुर
एक दिन बिला जाइत छैक ओकरो नाम
एक बेर आर अपन नैहर जयबाक मनोरथ लेने
ओहो पसबैत अछि भात
आ कहैत अछि—
हमरा तँ मडुयेक रोटी नीक लगैत अछि
ओहो नीपैत अछि चिनवार
लेपैत अछि टुटलहा ओसार
भोर-साँझ माँजैत अछि डेकची-लोहियाक अम्बार
ओकरो काया बनि जाइत छैक पीड़ाक खम्हार
ओहो झहरैत जाइत अछि
टूटल घरकेँ टूटऽसँ बचाबऽमे
ओहो नैहरसँ आयल लोककेँ पीढ़ी दैत अछि
जल पियाबैत अछि तमाकू दैत अछि
आ कहैत अछि
कतेक सुख अछि! कतेक सुख अछि!
- पुस्तक : एकटा हेरायल दुनिया (पृष्ठ 46)
- रचनाकार : कृष्णमोहन झा
- प्रकाशन : अंतिका प्रकाशन
- संस्करण : 2020
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
