कुछ बीतिगा लड़कपन की मौज म,मस्ती मा
कुछ बीतिगा डगर मा सुनसान म बस्ती मा
कुछ बीति ग खोवइ मा कुछ बीति ग पावइ मा
कुछ बीति ग रोवइ मा कुछ बीति ग गावइ मा।
का चूक भइ न कबहूँ सोचइ क भा सुभीता।
एक साल अउर बीता।
कबहूँ जनान दुनिया अबहीं उछिन्न होई,
कबहूँ जनान सगरौ अब ताक धिन्न होई।
कबहूँ बजी पिपिहिरी कबहूँ बजा नगाड़ा,
गइ जरि कभौं उखाड़ी, झंडा ग कभौं गाड़ा।
कबहूँ त बिना बातइ के लागिगा पलीता।
एक साल अउर बीता।
परसौं अहै दसहरा नरसौं अहै देवारी,
सब आइ के चला गे तिउहार बारी-बारी।
पनंरा अगस्त आवा, फिर आइ दुइ अक्तूबर,
हफ्ता भरे क झंझट फैलाइ गा नवंबर।
नापै के बरे जिनगी हर साल नवा फीता।
एक साल अउर बीता।
महजिद से ताल ठोंकेन, मंदिर से ताल ठोंकेन,
केतनौ गयेन छोड़ावा फिर फिर से ताल ठोंकेन।
बनि के धरमधुरी सब केतना रकत बहाएन,
खूनइ क किहेन उल्टी खूनइ म खुब नहाएन।
दुइनौ छलाँग मारेन केउ बाघ केहू चीता।
एक साल अउर बीता।
दर्शन तलइयन के दिन फिर से किहे फेरा,
घाटन प खिली सुतुही, पानी म कुईं बेरा।
फिर हरसिंगार फूला, फिर डार-डार गमकी,
पछियाँव तनी दुरका सगरी सेंवार गमकी।
गदराई गईं उखिया, पियराइ गा पपीता।
एक साल अउर बीता।
हमरेउ अँजोर लौटइ, तोहरेउ अंजोर लौटइ,
इंसान कि जिनगी मा फिर फिर से भोर लौटइ।
धरती क भाग जागइ दुख औ दरिद्द भागइ,
संसार के अंगना मा फिर जोत परब लागइ।
रावन क कै उछिन्नी लौटइ सुमति क सीता।
एक साल अउर बीता।
kuch bitiga laDakpan ki mauj ma,masti ma
kuch bitiga Dagar ma sunsan ma basti ma
kuch biti ga khovai ma kuch biti ga pavai ma
kuch biti ga rovai ma kuch biti ga gavai ma.
ka chook bhai na kabhun sochai ka bha subhita.
ek saal aur bita.
kabhun janan duniya abhin uchhinn hoi,
kabhun janan sagrau ab taak dhinn hoi.
kabhun baji pipihiri kabhun baja nagaDa,
gai jari kabhaun ukhaDi, jhanDa ga kabhaun gaDa.
kabhun ta bina batai ke lagiga palita.
ek saal aur bita.
parsaun ahai dasahra narsaun ahai devari,
sab aai ke chala ge tiuhar bari bari.
pananra agast aava, phir aai dui aktubar,
haphta bhare ka jhanjhat phailai ga navambar.
napai ke bare jingi har saal nava phita.
ek saal aur bita.
mahjid se taal thonken, mandir se taal thonken,
ketnau gayen chhoDava phir phir se taal thonken.
bani ke dharamadhuri sab ketna rakat bahayen,
khunai ka kihen ulti khunai ma khub nahayen.
duinau chhalang maren keu baagh kehu chita.
ek saal aur bita.
darshan talaiyan ke din phir se kihe phera,
ghatan pa khili sutuhi, pani ma kuin bera.
phir harsingar phula, phir Daar Daar gamki,
pachhiyanv tani durka sagri senvar gamki.
gadrai gain ukhiya, piyrai ga papita.
ek saal aur bita.
hamreu anjor lautai, tohreu anjor lautai,
insaan ki jingi ma phir phir se bhor lautai.
dharti ka bhaag jagai dukh au daridd bhagai,
sansar ke angna ma phir jot parab lagai.
ravan ka kai uchhinni lautai sumti ka sita.
ek saal aur bita.
kuch bitiga laDakpan ki mauj ma,masti ma
kuch bitiga Dagar ma sunsan ma basti ma
kuch biti ga khovai ma kuch biti ga pavai ma
kuch biti ga rovai ma kuch biti ga gavai ma.
ka chook bhai na kabhun sochai ka bha subhita.
ek saal aur bita.
kabhun janan duniya abhin uchhinn hoi,
kabhun janan sagrau ab taak dhinn hoi.
kabhun baji pipihiri kabhun baja nagaDa,
gai jari kabhaun ukhaDi, jhanDa ga kabhaun gaDa.
kabhun ta bina batai ke lagiga palita.
ek saal aur bita.
parsaun ahai dasahra narsaun ahai devari,
sab aai ke chala ge tiuhar bari bari.
pananra agast aava, phir aai dui aktubar,
haphta bhare ka jhanjhat phailai ga navambar.
napai ke bare jingi har saal nava phita.
ek saal aur bita.
mahjid se taal thonken, mandir se taal thonken,
ketnau gayen chhoDava phir phir se taal thonken.
bani ke dharamadhuri sab ketna rakat bahayen,
khunai ka kihen ulti khunai ma khub nahayen.
duinau chhalang maren keu baagh kehu chita.
ek saal aur bita.
darshan talaiyan ke din phir se kihe phera,
ghatan pa khili sutuhi, pani ma kuin bera.
phir harsingar phula, phir Daar Daar gamki,
pachhiyanv tani durka sagri senvar gamki.
gadrai gain ukhiya, piyrai ga papita.
ek saal aur bita.
hamreu anjor lautai, tohreu anjor lautai,
insaan ki jingi ma phir phir se bhor lautai.
dharti ka bhaag jagai dukh au daridd bhagai,
sansar ke angna ma phir jot parab lagai.
ravan ka kai uchhinni lautai sumti ka sita.
ek saal aur bita.
स्रोत :
पुस्तक : माटी औ महतारी (पृष्ठ 10)रचनाकार : आद्या प्रसाद 'उन्मत्त'
प्रकाशन : अवधी अकादमी
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
