अब दर-दर मारा फिरत अही, बिललात अही, मजबूर अही।
भइया हम तौ मजदूर अही।
कल तक तौ पूजा जात रहे सब कहयँ कि हम भगवान अही।
हमरिन मेहनत के दमखम से वै कहयँ कि हम धनवान अही।
वै कहा करयँ कि तुहिन से ई सब बंगला, कोठी, कार अहै।
तोहरेन वोटे के बलबूते येहि देसवा कै सरकार अहै।
जब बिपदा आय करोना कै, सब आपन हाथ सिकोरि लेहेन।
घर कै दरवाजा बंद केहेन, सब रोजी-रोटी छोरि लेहेन।
हम दाना का मोहताज भये, हँडिया-कुचुरी सब खाली भै।
लरिकौ कै पेट न भरि पाये, चौगिरदा से बदहाली भै।
घरहूँ से कइसे मदत मिलय, सैकड़न कोस हम दूर अही।
भइया हम तौ मजदूर अही।
स्रोत :
- रचनाकार : अनुज नागेंद्र
- प्रकाशन : हिन्दवी के लिए लेखक द्वारा चयनित
Additional information available
Click on the INTERESTING button to view additional information associated with this sher.
About this sher
Close
rare Unpublished content
This ghazal contains ashaar not published in the public domain. These are marked by a red line on the left.
